Në një atmosferë festive, plot emocion, respekt dhe frymë shqiptarie, familja Dedivanaj organizoi një mbrëmje madhështore në rezidencën e atdhetarit Agron Dedivanaj, duke mirëpritur personalitete të njohura të jetës politike, institucionale, kulturore, afariste dhe të diasporës shqiptare.

Kjo mbrëmje u shndërrua në një ngjarje të veçantë, ku u bashkuan miq, bashkëpunëtorë dhe dashamirës nga trevat shqiptare dhe diaspora, duke dëshmuar edhe një herë se Trieshi mbetet një vatër e rëndësishme e identitetit kombëtar dhe e mikpritjes tradicionale shqiptare.

Me praninë e tij, këtë organizim e nderoi Zëvendës kryeministri dhe ministri i ekonomisë, Nik Gjeloshaj, Kryetari i Komunës së Tuzit, Lindon Gjelaj, së bashku me shumë personalitete të tjera nga jeta publike, përfaqësues institucionesh, veprimtarë të çështjes kombëtare, afaristë dhe përfaqësues të diasporës.

Gjatë mbrëmjes u vlerësua kontributi i familjes Dedivanaj, e në veçanti i Agron Dedivanajt, i cili prej vitesh jeton në Shtetet e Bashkuara të Amerikës, por vazhdon ta mbajë të fortë lidhjen me vendlindjen. Ndërtimi i rezidencës së tij në Triesh u cilësua nga të pranishmit si një simbol i ruajtjes së identitetit kombëtar, i respektit për rrënjët dhe i dashurisë së pakushtëzuar për tokën e të parëve.

Një moment i veçantë dhe mjaft emocionues ishte festimi i ditëlindjes së Zef Berishaj, kryetar i Shoqatës “Jehona e Malësisë”, një personalitet i njohur për kontributin e tij në ruajtjen dhe promovimin e trashëgimisë kulturore, historisë dhe traditave të Malësisë. Në një atmosferë të ngrohtë, mes urimeve, duartrokitjeve dhe emocioneve, të pranishmit i uruan atij shëndet, jetë të gjatë dhe suksese të mëtejshme në misionin e tij në shërbim të komunitetit.

Muzika, këngët shqipe, vallet tradicionale dhe bisedat miqësore i dhanë kësaj mbrëmjeje një atmosferë të veçantë, duke e kthyer atë në një festë të unitetit, të miqësisë dhe të krenarisë kombëtare.

Mbrëmja në familjen Dedivanaj ishte një dëshmi se shqiptarët, kudo që jetojnë, mbeten të lidhur fort me rrënjët e tyre. Ishte një mbrëmje që përcolli mesazhin se vlerat e familjes, mikpritja, bashkimi dhe dashuria për vendlindjen janë themelet mbi të cilat ndërtohet e ardhmja e një kombi.

Në fund, të pranishmit u ndanë me bindjen se mbrëmje të tilla nuk janë vetëm festa, por edhe takime që forcojnë lidhjet mes njerëzve, ruajnë traditën dhe mbajnë gjallë shpirtin e shqiptarisë, duke e bërë Trieshin një pikë referimi për të gjithë ata që e duan dhe e nderojnë vendin e të parëve.