Presidenti i Iranit, Masoud Pezeshkian, ka deklaruar se vendi i tij është i gatshëm t’i rikthehet marrëveshjes së armëpushimit me Shtetet e Bashkuara, nëse edhe Washingtoni i përmbahet zotimeve të bëra.

Pezeshkian i bëri këto deklarata të martën, në samitin e Organizatës së Bashkëpunimit të Shangait në Kirgistan, në kohën kur tensionet mes Iranit dhe SHBA-së janë rritur sërish.

“Nëse SHBA-ja kthehet te zotimet e saj, Irani do të përgjigjet menjëherë në të njëjtën mënyrë”, tha presidenti iranian, sipas mediave shtetërore të Iranit.

Marrëveshja e arritur në qershor parashikonte ndalimin e luftimeve dhe zhvillimin e bisedimeve për një marrëveshje më të gjerë paqeje.

Sipas marrëveshjes, Irani do të lejonte qarkullimin e anijeve në Ngushticën e Hormuzit, ndërsa SHBA-ja do të hiqte bllokadën detare, do të lehtësonte disa sanksione dhe do të lejonte eksportet iraniane të naftës.

Por marrëveshja nuk zgjati shumë dhe dy vendet kanë shkëmbyer sërish zjarr gjatë ditëve të fundit.

Edhe ministri i Jashtëm iranian, Abbas Araghchi, tha se SHBA-ja duhet t’i përmbushë zotimet e saj.

Ndërkohë, Pezeshkian theksoi se Irani nuk dëshiron luftë, por paralajmëroi se vendi i tij do të përgjigjet nëse sulmohet.

Tensionet u përshkallëzuan të hënën, kur SHBA-ja goditi dy lëshues iranianë në ishullin Larak, pranë Ngushticës së Hormuzit.

Përplasjet e fundit kanë rritur frikën se konflikti mes dy vendeve mund të përshkallëzohet sërish, por deklaratat e fundit nga Teherani lënë të hapur mundësinë e rikthimit në negociata.