Kryeministri i Shqipërisë, Edi Rama, ka publikuar në rrjetet sociale pamje, moshën dhe inicialet e disa personave të ndaluar gjatë protestave të dhunshme të ditëve të fundit, duke pretenduar se ata nuk janë studentë dhe nuk kanë lidhje me universitetin.

Sipas Ramës, disa prej personave të ndaluar kanë precedentë penalë, ndërsa ai ka pretenduar se protestuesit janë paguar nga krimi i organizuar dhe forca të huaja që, sipas tij, synojnë të përmbysin Shqipërinë. Kreu i qeverisë ka paralajmëruar se të nesërmen do të publikojë edhe të dhëna të tjera.

“Po, ndaj me ju pamje që do të tronditin shumë kënd. Është ruajtur konfidencialiteti në respekt të ligjit. Të gjithë janë persona të ndaluar dhe subjekt i ligjit. U ndaluan në protestat e dhunshme dhe nuk janë studentë, nuk kanë asnjë lidhje me të gjithë ata studentë që nuk i janë bashkuar kësaj dallge terrori urban, por që qëndrojnë në një front proteste”, ka deklaruar Rama.

Ai ka thënë se disa persona, përmes “Instagram”-it dhe “TikTok”-ut, e mbështesin dhunën si një mënyrë për të rrëzuar qeverinë e zgjedhur dhe për ta detyruar të ndryshojë qëndrimin e saj.

“Fytyra që janë paguar nga krimi i organizuar dhe forca të huaja që duan të përmbysin Shqipërinë. Këta nuk janë studentët, e kam thënë që në krye të herës, dhe tani është koha që kjo fjali të mbështetet nga fakte e dokumente”, ka thënë Rama.

Personat e përmendur nga Rama

Gjatë deklaratës së tij, Rama ka përmendur disa persona me iniciale dhe moshë, duke u atribuar atyre dënime të mëparshme ose precedentë penalë.

• G.I., 57 vjeç: Rama ka pretenduar se është dënuar më parë për dhunë në familje dhe mosbindje ndaj urdhrit të policisë.
• B.P., 41 vjeç: Sipas Ramës, ka precedentë penalë për prishje të rendit dhe qetësisë publike, dhunë në familje dhe tentativë për marrëdhënie seksuale me motrën.
• A.B., 40 vjeç: Rama i ka atribuar precedentë penalë për pjesëmarrje në protesta dhe tubime të paligjshme, si dhe për dhunë ndaj një punonjësi policie.
• E.K.: Sipas deklaratës së Ramës, është dënuar për vjedhje, pjesëmarrje në protesta dhe tubime të paligjshme, pengim të qarkullimit dhe dëmtime të tjera me dashje.
• S.X., 28 vjeç: Rama ka pretenduar se ka precedent penal për prodhim dhe shitje të lëndëve narkotike.
• E.V., 45 vjeç: I janë atribuar precedentë penalë për vetëgjyqësi, mashtrim dhe fshehje të ardhurash. Rama ka thënë gjithashtu se është i dyshuar për marrje financimesh nga fonde të Republikës Islamike të Iranit.
• S.D., 45 vjeç: Sipas Ramës, ka precedentë penalë për goditje për shkak të detyrës, falsifikim dokumentesh dhe ndotje.
• XH.P., 27 vjeç: Rama i ka atribuar precedentë penalë për pjesëmarrje në protesta të paligjshme, pengim të qarkullimit dhe prodhim e shitje të lëndëve narkotike.
• J.S., 20 vjeç: Rama ka pretenduar se nuk është student dhe ka precedent penal për prodhim dhe shitje të lëndëve narkotike.
• V.A., 36 vjeç: Sipas Ramës, është dënuar me 40 muaj burgim në Britaninë e Madhe për prodhim dhe shitje të lëndëve narkotike, si dhe me dy vjet e pesë muaj burgim për trafikim të qenieve njerëzore.
• A.M., 28 vjeç: Rama i ka atribuar precedentë penalë për shkelje të rregullave të qarkullimit, dëmtime me dashje, mashtrim dhe falsifikim dokumentesh.
• A.F., 38 vjeç: Sipas deklaratës së kryeministrit, ka precedentë penalë për prodhim dhe shitje të lëndëve narkotike, si dhe për vjedhje.

Në fund të deklaratës, Rama ka kritikuar mediat, personazhet publike dhe të tjerë që, sipas tij, e kanë paraqitur protestën në mënyrë heroike, ndërsa kanë pretenduar se mbështesin pensionistët dhe studentët.

Pretendimet e paraqitura nga kryeministri për personat e përmendur nuk janë verifikuar në mënyrë të pavarur në këtë material.