Pas tetë rasteve të reja të konfirmuara mbrëmë në Vushtrri me koronavirus, kryetari i kësaj komune, Xhafer Tahiri, ka konfirmuar se këto raste kanë qenë raste kontakti me të infektuarin që ka dalë pozitiv ditën e shtunë.

Tahiri ka thënë se personi i cili ka dalë pozitiv kishte vizituar tri ordinanca private, por të njëjtat nuk e kanë rekomanduar për testim për Covid-19 ani pse ka pasur shenja. Nga ky person janë infektuar tetë persona, në mesin e tyre tre punëtorë shëndetësorë.

Tahiri në një lidhje të drejtpërdrejtë në RTV Dukagjini ka treguar se në dy javët e ardhshme shërbimet e rëntgenit dhe marrja e infuzioneve do të jenë të mbyllura në spitalin e Vushtrrisë.

Të gjitha rastet e kontaktit në Vushtrri janë në vetizolim, duke përfshirë edhe ata që kanë rezultuar negativë për Covid-19.

Deri tani kjo komunë ka shënuar gjithsej 55 raste me koronavirus, ku 31 prej tyre janë aktive.