Është ngritur kallëzim penal ndaj ushtrueses së detyrës së kryeinspektores së Shëndetësisë, Dr. Nora Kursani Demjahës.

Demjaha dyshohet të ketë kryer veprën penale “Keqpërdorim i detyrës apo autoritetit zyrtar”, duke marrë vendim për ndërprerjen e punës së qendrës shëndetësore “KosovaMed Healthcare SHPK”, shkruan Indeksonline.

Nën firmën e Demjahës, Inspektorati Shëndetësor, përmes vendimit të datës 27.10.2023, e pati ndaluar punën e “KosovaMed Healthcare SHPK” në QKMF – Drenas.

Ky vendim më vonë do të anulohej, nga Komisioni për shqyrtimin e Ankesave, për shkak të paligjshmërisë së tij.

Dyshohet se u.d kryeinspektorja Demjaha, I kishte dërguar e-mail Drejtorisë së Shëndetësisë të Komunës së Drenasit, duke e urdhëruar drejtoreshën e kësaj Drejtorie që ta zbatojë vendimin e Inspektoratit Shëndetësor, për ndalimin e marrjes së shërbimeve nga Operatori Ekonomik “KosovaMed Healthcare SHPK”, nën arsyetimin se “KosovaMed Healthcare SHPK” do të duhej të kishte licencë nga Ministria e Shëndetësisë, në mënyrë që të ishte i aftë të lidhte kontratë me QKMF – Drenas.

Në arsyetimin e të njëjtit vendim thuhet se “KosovaMed Healthcare SHPK” ka të punësuar staf shëndetësor të cilët kryejnë shërbime shëndetësore sipas kontratës publike kornizë, të nënshkruar nga komuna e Drenasit.

Përveç Demjahës, kallëzim penal është ngritur edhe ndaj inspektores shëndetësore, Hikmete Blakqori, si dhe ndaj inspektorit shëndetësor, Nysret Kuleta.