Kryetari i Partisë Demokratike të Kosovës (PDK), Memli Krasniqi, ka kërkuar nga deputetët e kuvendit që të mos e përkrahin propozimin e Qeverisë për ndarjen e buxhetit për investimet kapitale.

Me anë të një postimi në Facebook, Krasniqi konsideron se i njëjti është diskriminues pasi sipas tij, Lëvizja Vetëvendosje i ka mbështetur vetëm komunat në të cilat udhëheqë.

“Derisa për katër komunat që udhëhiqen nga Lëvizja Vetëvendosje, Qeveria ka ndarë më shumë se gjysmën e buxhetit për investime të reja kapitale për vitin 2024, për katër komuna që udhëhiqen nga Partia Demokratike e Kosovës – Ferizajn, Skënderajn, Kaçanikun e Hanin e Elezit, nuk është ndarë asnjë cent. Gjilani, Shtimja, Kamenica dhe Podujeva përbëjnë 11.6 % të popullsisë së Kosovës, ndërsa u është ndarë 59.5 % e buxhetit për investime të reja kapitale. Ndërkaq, për të gjithë të tjerët, që janë 88.4 % e popullsisë, Qeveria ka ndarë vetëm 40.5 % të këtij buxheti. Ky është diskriminimi më i egër institucional ndaj qytetarëve në historinë e Kosovës, që prej çlirimit të vendit tonë”, shkroi ai.

Kreu i PDK-së theksoi se kjo qasje e Qeverisë për të cilën ai vlerëson se është kundër qytetarëve të komunave të cilat nuk i drejton partia në pushtet, është shantazh i ulët politik.

Ai konsideron se është e papranueshme të votohet një buxhet i tillë.

“Kultura politike në Kosovë ka nevojë të shtensionohet e të rritet bashkëpunimi, jo të instalohet kjo kulturë e hakmarrjes dhe diskriminimit. Unë ftoj edhe deputetët e Vetëvendosjes, krahas atyre të opozitës, që me votën e tyre të mos e vulosin këtë propozim diskriminues të Qeverisë. Është e turpshme dhe e papranueshme të votohet për një buxhet të tillë”, shtoi më tej ai.