Aktivisti Shpend Gjocaj ka protestuar para Kuvendit të Kosovës, duke kërkuar që vendi të lidhet me gazin amerikan dhe të shfuqizohet Ligji për shtetësinë, të cilin ai e cilësoi si ligj për “serbizimin” e Kosovës.

Para mediave, Gjocaj ka thënë se shpreson që deputetët ta kenë parasysh rrezikun që, sipas tij, i kanoset Kosovës nga vendimet që marrin.

Ai ka deklaruar se kundërshtimi i Shteteve të Bashkuara është i dëmshëm për Kosovën dhe ka theksuar se siguria energjetike është pjesë e sigurisë kombëtare.

“Një politikan që është kundër Amerikës është kundër kombit e kundër shtetit. Siguria energjetike është siguri kombëtare. Ne nuk kemi siguri energjetike. Konsideroj që lidhja e Kosovës me gazin amerikan është jetike”, ka thënë Gjocaj.

Ai u ka bërë thirrje deputetëve që të mbështesin lidhjen e Kosovës me gazin amerikan dhe të shfuqizojnë Ligjin për shtetësinë, duke paralajmëruar se, në të kundërtën, qytetarët do të reagojnë.