Futbollisti i Sionit, Ermir Lenjani e ka refuzuar ftesën për t’iu bashkuar Kombëtares së Shqipërisë.

Ai ka thënë se ky refuzim ka ardhur për faktin se trajneri Christian Panucci nuk po e fton që një kohë të gjatë edhe përkundër formës se lartë që ka vitin e fundit. Lenjani ka bërë me dije se derisa të jetë Panucci trajner i Shqipërisë ai nuk do të pranon të veshë fanellën kuqezi.

“Kur lëndohen 4-5 lojtarë trajnerit i bie në mend që luan diku Ermir Lenjani dhe më dërgon ftesë. Faleminderit, por JO. Me lot në sy e them se nuk do të grumbullohem më me Kombëtaren sa të jesh ti aty. Kam kontribuar shumë dhe meritoj respekt”, ka shkruar Lenjenia në “Facebook”.

Postimi i plotë i Ermir Lenjanit pa ndërhyrje

Që nga viti 2013 jam pjesë e Kombëtares shqiptare dhe ndihem krenar për këtë gjë. Saherë jam ftuar e kam pranuar ftesën me dëshirën më të madhe pasi çdo herë kur e kam veshur fanellën kuq e zi e kam veshur me shumë dashuri. Kam qenë gati gjithmonë, kam sakrifikuar shumë, jam gjakosur, kam qarë e kam qeshur si futbollist i Shqipërisë. Kam pranuar edhe stolin, por jam respektuar gjithmonë. Tani në dy vitet e fundit jam duke kaluar nëpër një formë shumë të mirë, por po injorohem nga trajneri momental i Kombëtares. Nuk kam luajtur asnjë minut në Ligën e Kombeve, por nuk kam bërë zhurmë dhe kam vazhduar të punoj edhe më fort. Kur lëndohen 4-5 lojtarë trajnerit i bie në mend që luan dikund Ermir Lenjani dhe më dërgon ftesë. Faleminderit, por JO. Me lot në sy e them se nuk do të grumbullohem më me Kombëtaren sa të jesh ti aty. Kam kontribuar shumë dhe meritoj respekt. Dashuria ime për Shqipërinë është më e madhe se urrejtja jote për mua. Unë kam qenë, jam dhe gjithmonë do të jem djal i Shqipërisë, ndërsa ti je vetëm kalimtar.

/Epoka e re/