Maria Suokko (Finlandë) është emëruar Përfaqësuese e Përhershme e UNDP-së në Kosovë dhe ka filluar punën sot, më 17 qershor.

Ajo zëvendëson në këtë pozitë Alessandra Roccasalvo, e cila ka qenë në këtë detyrë nga 1 janari 2019-s.

Para emërimit në këtë detyrë, Suokko ishte këshilltare e lartë në Ministrinë e Punëve të Jashtme të Finlandës në Helsinki që nga shtatori 2017. Ajo gjithashtu shërbeu si Udhëheqëse për Bashkëpunim pranë MPJ të Finlandës në Myanmar (2014-2017) dhe Këshilltare e Lartë në MPJ të Finlandës (2012-2014).

Përvoja e saj me Programin e Kombeve të Bashkuara për Zhvillim (UNDP) përfshin postin e Specialistes të Programit në Byronë Rajonale për Azi dhe Paqësor (2006-2010), Ndihmës Përfaqësuese e Përhershme në UNDP Kinë (2001-2005), Menaxhere e Programit Mjedisor të UNDP-së në Kamboxhia (2000- 2001) dhe Zyrtare e Programit në UNDP Tajlandë (1998-2000).

Ajo ka një diplomë master në Shkencat Sociale (Ekonomi) nga Universiteti i Helsinkit.

Pas emërimit të saj si Përfaqësuese e Përhershme në zyrën e UNDP-së në Kosovë, Maria Suokko, ka thënë se ka marrë ketë detyrë në një moment shumë të rëndësishëm pasi zyra e UNDP-së po shënon 20-vjetorin e bashkëpunimit të suksesshëm në Kosovë. “Me padurim pres që të takoj të gjithë partnerët tanë kosovarë dhe ndërkombëtarë dhe të vazhdojmë përpjekjet tona të përbashkëta në mbështetjen e rrugës së zhvillimit që do të sigurojë një të ardhme të qëndrueshme për të gjithë”, ka thënë Suokko.

Përveç gjuhës finlandeze, Maria gjithashtu flet anglisht, suedisht, si dhe, deri në një masë, frëngjisht dhe gjermanisht.

/Epoka e re/