Milan ka shënuar fitore ndaj Inter me rezultat minimal 1:0 në derbin e madh të qytetit të Milanos në Serie A. Me këtë triumf, Milani ka arritur ta mposhtë dy herë Inter në kampionat brenda një sezoni për herë të parë që nga edicioni 2010/2011. Në të njëjtën kohë, Inter e ka pësuar humbjen e parë në ligë që nga nëntori.

Ndeshja ka nisur me rast të mirë për Milan që në minutat e para. Christian Pulisic ka përfituar nga një gabim i portierit Yann Sommer dhe ka asistuar për Luka Modric, por goditja e kroatit ka përfunduar shumë pranë shtyllës.

Interi ka pasur pak raste në pjesën e parë dhe nuk ka arritur të rrezikojë seriozisht portën e Mike Maignan. Ndërkohë, Milan ka kaluar në epërsi pas një aksioni, kur Youssouf Fofana ka asistuar për Pervis Estupinan, i cili ka shënuar me një goditje të fortë në rrjetë.

Në pjesën e dytë, Inter është përpjekur ta barazojë rezultatin dhe ka krijuar disa raste. Piotr Zielinski e ka rrezikuar portën e Milan, ndërsa Federico Dimarco ka pasur një mundësi të mirë, por goditja e tij ka përfunduar mbi portë.

Milan gjithashtu e ka kërkuar golin e dytë me Rafael Leao dhe Fofana, por rezultati nuk ka ndryshuar deri në fund.

Pas kësaj fitore, diferenca mes dy skuadrave kryesuese në Serie A është ngushtuar në shtatë pikë, ndërsa kanë mbetur edhe dhjetë ndeshje deri në fund të sezonit. Kjo humbje i ka dhënë fund edhe serisë prej tetë fitoresh rresht të Inter në kampionat.