Në kuadër të vizitës në Rumani dhe pjesëmarrjes në takimin joformal të organizuar nga Rumania si kryesuese e Presidencës së radhës së Këshillit të BE-së, zëvendëskryeministri i parë dhe ministri i Punëve të Jashtme i Kosovës, Behgjet Pacolli, është takuar me ministrin e jashtëm të Polonisë, Jacek Czaputowicz, ministrin e jashtëm të Çekisë Tomas Petricek, dhe ministrin e  jashtëm të Sllovakisë, Miroslav Lajcak.

Gjatë takimit me kryediplomatin polak, ministri i jashtëm, Pacolli, është siguruar për përkrahjen e këtij shteti në të gjitha proceset integruese ndërkombëtare të vendit tonë si dhe liberalizimin e vizave për qytetarët e Kosovës.

Më pas është shfaqur interesim mbi mbarëvajtjen e procesit të dialogut në mes Republikës së Kosovës dhe Serbisë, përderisa diplomati polak ka kërkuar rishqyrtimin e taksës së vendosur ndaj Serbisë.

Samiti Procesit të Berlinit, i cili sivjet do të mbahet në Poloni ka qenë temë tjetër e diskutimit në mes dy bashkëbiseduesve, ku u theksua se Polonia mbetet e përkushtuar për procesin e zgjerimit edhe me vendet e Ballkanit Perëndimor dhe do ta ndihmojë atë në përafrimin me BE-në.

Ministri Pacolli ka takuar edhe ministrin e jashtëm të Çekisë, Tomas Petricek.

Në kuadër të këtij takimi dypalësh, ministri çek ka shprehur mbështetjen e Çekisë në të gjitha proceset e rëndësishme të integrimit ndërkombëtarë të Kosovës.

Po ashtu, në këtë takim është diskutuar edhe për thellimin e bashkëpunimit ekonomik me theks të veçantë në krijimin e kushteve për investitorët çek në Kosovë.

Gjithashtu është bërë me dije se po punohet edhe në përcaktimin e një date për vizitën e ministrit Pacolli në Pragë, me qëllim të thellimit të bashkëpunimit në mes të dy vendeve.

Gjatë qëndrimit në Bukuresht ministri Pacolli është takuar edhe me ministrin e jashtëm të Sllovakisë, Miroslav Lajcak.

Ministri Lajcak ka shprehur interesimin e shtetit sllovak për stabilitetin në Ballkan dhe mbështetjen e dialogut në mes Republikës së Kosovës dhe Serbisë, ndërsa ka bërë me dije se së shpejti do ta vizitojë vendin tonë, si kryesues i radhës i OSBE-së.

Sipas kryediplomatit Lajcak, Sllovakia nuk e kundërshton procesin e liberalizimit të vizave për Kosovën, ndërkohë që është shprehur interesimi i këtij shteti për thellimin e bashkëpunimit dhe diskutimit të mundësive për hapjen e Zyrës Përfaqësuese të vendit tonë në Bratislavë.

Në margjina të takimit joformal, të organizuar nga shteti i Rumanisë, ministri Pacolli ka takuar edhe homologun e tij slloven, Miro Cerar, përfaqësuesen e lartë të Bashkimit Evropian për Punë të Jashtme dhe Siguri, Federica Mogherini, dhe komisionerin për Zgjerim të BE-së, Johannes Hahn.

Gjatë takimit me ministrin e Sllovenisë është biseduar për mbështetjen e Republikës së Kosovës në procesin e liberalizimit të vizave, marrëdhëniet dy palëshe dhe mbështetjen e tyre në proceset e tjera integruese euroatlantike.

Ndërsa me Mogherini dhe Hahni, Pacolli ka folur për procesin e dialogut mbi normalizimin e marrëdhënieve me Serbinë.

Ai ka kërkuar  që dialogu të vazhdojë pavarësisht masës së vendosur nga Qeveria e Kosovës.

Zyrtarët e BE-së kanë thënë se dialogu patjetër duhet të vazhdojë dhe se do të bëjnë përpjekje për ta rifilluar këtë proces.

/Epoka e re/