Real Madrid ka mposhtur 2-0 Roma-n në Olimpico duke siguruar vendin e parë të grupit G të Champions League. Pas një pjese të parë të vakët, skuadra e Solari-t mori frenat e lojës në dorë pas pushimit duke bërë një paraqitje dominuese ndaj Roma-s që i kishte dhënë shumë hapësira të rinjve pasi kishte siguruar kualifikimin. Ndeshja është e fortë dhe në shumicën e rasteve e barabartë. Real ka më shumë topin nën kontroll por nuk arrin ta shfrytëzojë për të krijuar mundësi goli kjo edhe për shkak të mbrojtjes solide të Roma-s. Mundësia e parë e mirë ishte e vendasve pas pak më shumë se gjysmë ore, ndërsa Cengiz Under ka humbur një rast me portën e boshatisur në fund të pjesës së parë. Se si e ka humbur, atë e di vetëm ai.

Pas pushimit ka vetëm një ekip në fushë, dhe ai është Real Madrid. Që në minutën e 47’ Los Blancos zhbllokojnë rezultatin me Gareth Bale. Duheshin tre gabime të Roma-s brenda një aksioni që sulmuesi uellsian, deri në atë moment i padukshëm, të shënonte golin e avantazht. Goli i dha vetëbesim miqve dhe në minutën e 59’ erdhi goli i sigurisë. Ishte Lucas Vazquez ai që dyfishoi rezultatin pas pasimit me kokë të Benzema brenda zonës. Ritmi i lojës mbetet i lartë teksa Real vazhdon të dominojë ndaj një Roma që luan me shumë lojtarë të rinj pasi ka siguruar kualifikimin.