Ridvan Berisha: Arifi shkurtpamës, ja si e shpërfillë lobimin e Faton Bislimit në ShBA
Gazetari Ridvan Berisha ka thënë se kryetari i Preshevës Shqipërim Arifi është shkurpamës duke e baltosur me neveri lobimin në Uashington te aktivistit Faton Bislimi.
“Asnjë gjë nuk po paraqet lajm në mjedisin tonë sado që të jetë me rëndësi pesha e ngjarjeve. Keq, kjo shoqëri konsideroj se vërtetë po rrëshqet në greminë kënetash kulturore. U shokova ndërsa po e ndiqja këtë jave kryetarin e Preshevës Shqipërim Arifi, teksa e baltoste me neveri lobimin në Uashington te aktivistit Faton Bislimi. Me nismën e Bislimit e miqve të shumtë që ka ai në Shtëpinë e Bardhë, në Senat e Kongresin amerikan, arriti për herë të parë ta mbledh Komitetin për Politike të Jashtme të Senatit për të trajtuar në këtë nivel të lartë instance çështjen e të drejtave dhe lirive themelore të njërit për shqiptarët e Luginës së Preshevës. Vërtetë kush nuk e sheh këtë si arritje serioze politike jeton me një problem serioz të të kuptuarit e thelbit të brengave që i kanë shqiptarët që jetojnë nen diskriminim në Serbi”, ka shkruar Berisha në “Facebook”.
Ai ka thënë se shpërfillja e kësaj ngjarje me peshë të jashtëzakonshme politike nga kryetari Arifi, me lloj-lloj akuzash, që janë çështje e gjykatave, përfaqëson thënë me se buti, karakterin e një politikani shkurtpamës e mbase edhe pa vizion.
“Faton, sot të shpërfillin, nga inati natyrisht por mos hiq dore nga mirëmbajtja dhe kultivimi i raporteve me miqtë tuaj në ShBA sepse druaj se edhe Kosova nuk mbahet në mend të ketë pasur këtë raport gati pikëllues me administratën amerikane”, ka shkruar Ridvan Berisha.