Ish-kryetari i Kaçanikut, Xhabir Zharku, që dy ditë ka hyrë në grevë urie në qendrën e paraburgimit në Prishtinë.

Lajmin e ka bërë me dije avokati i tij, Tomë Gashi. Ai ka thënë se arsyeja e hyrjes në grevë të Zharkut është cilësia e dobët e ushqimit.

“Klienti im, z.Xhabir Zharku që nga data 23.05.20 është në grevë urie në Qendrën e Paraburgimit në Prishtinë. Ai është në grevë urie për shkak të përkeqësimit të cilësisë së ushqimit. Sipas tij, përveç ushqimit të dobët që ai nuk mundet fare ta konsumojë edhe për shkak se ai është diabetik. As në kantinën që është brenda burgut nuk ka fare ushqime cilësore që mund të blihen nga të paraburgosurit.

“Greva e tij është senzibilizuese që çështja e ushqimit në burg të përmirësohet. Sot e kam vizituar dhe gjendja e tije është stabile, me shenja të përkeqësimit. Mbetet ditëve në vijim që çështja e kualitetit të ushqimit të shqyrtohet nga udhëheqësit e Qendrës së Paraburgimit në Prishtinë dhe Shërbimit Korrektues të Kosovës. Zotëri Xhabir Zharku është në paraburgim që nga 14.12.2019”, ka shkruar Gashi në llogarinë e vet në “Facebook”. (L.G/ Epoka e re)