Ymeri: Deklarata e komisionarit Hahn për vizat, shqetësuese

03 dhjetor 23:53

Nënkryetari i Partisë Socialdemokrate (PSD), Visar Ymeri, ka thënë se është shqetësuese për Kosovën, deklarata e komisionarit për zgjerimin të Bashkimit Evropian, Johanes Hahn, për çështjen e liberalizmit të vizave.

Ymeri në llogarinë e vet në “Facebook”, ka shkruar se lëvizja e lirë është një prej të drejtave dhe vlerave evropiane.

Postimi i plotë i Ymerit:

Është jashtëzakonisht shqetësuese të dëgjohet një deklarim i tillë nga Komisionari për Fqinjësi Evropiane dhe Negociata për Zgjerim, Johannes Hahn, për procesin e vizave për qytetarët e Kosovës.

Ky proces kishte qenë i lidhur padrejtësisht me ratifikimin e Marrëveshjes për Shenjim të Vijës Kufitare mes Kosovës dhe Malit të Zi, kushtëzim ky që asnjëherë nuk pati kurrfarë shpjegimi logjik. Dhe, tash pasi që kjo marrëveshje u ratifikua, na thuhet se megjithatë duhet të pres procesi i liberalizimit të vizave. Kështu po vihet në pikëpyetje vetë kredibiliteti i institucioneve të BE-së.

Lëvizja e lirë është një prej të drejtave dhe vlerave evropiane. Prandaj ngurrimi i vendeve të caktuara, anëtare të BE-së, për t’ua zgjeruar këto të drejta edhe qytetarëve të Kosovës, bie ndesh drejtpërdrejt me vlerat dhe të drejtat fundamentale që e kanë ndërtuar dhe mundësuar deri tash Bashkimin Evropian.

Është gabim dhe e dëmshme që politikat e BE-së, veçanërisht karshi rajonit e Kosovës, të fillojnë të skicohen bazuar në qëndrimet ksenofobe të ekstremit të djathtë. Rritja e popullaritetit të forcave të këtilla politike është shqetësues për të gjithë. Dorëzimi i pjesshëm karshi tyre rrezikon t’u jep atyre të drejtë, në vend se t’i luftojë e reduktojë ato.

Natyrisht që qeverisja në Kosovë e sundimi i ligjit duhet doemos të ndryshohen. Këto, jo për shkak të kushteve të BE-së, por për shkak të lirisë, barazisë e mirëqenies së qytetarëve. Mirëpo këto nuk ndryshohen duke plotësuar kritere objektive në regjistrin e disa burokratëve të Brukselit, por me një vizion progresiv zhvillimor për ekonominë e shoqërinë dhe me një proces gjithëpërfshirës vettingu për gjyqësorin, policinë dh prokurimin.

/Epoka e re/

Lajme të sponsorizuara

Të fundit
Pas taksës fillimisht prej 10 për qind për produktet serbe…