Erling Haaland mund të largohet nga Manchester City në verën e ardhshme, ndërsa për shërbimet e sulmuesit norvegjez interesohen Barcelona, Real Madridi dhe Paris Saint-Germaini.

Sipas raportimeve në mediat angleze dhe spanjolle, pasiguria rreth situatës financiare të Manchester Cityt dhe sanksioneve të mundshme ndaj klubit mund ta hapë rrugën për largimin e Haalandit.

Sulmuesi norvegjez raportohet se preferon të luajë në Spanjë, një rrethanë që mund t’u japë përparësi dy gjigantëve spanjollë në garën për transferimin e tij.

Barcelona e sheh Haalandin si përforcimin ideal për repartin ofensiv, ndërsa Real Madridi duhet të shqyrtojë mundësinë e largimit të ndonjë prej yjeve të skuadrës për të përballuar koston e marrëveshjes.

Paris Saint-Germaini, nga ana tjetër, ka kapacitetin financiar për t’u përfshirë fuqishëm në garën për sulmuesin e Manchester Cityt.