Deputeti i Lidhjes Demokratike të Kosovës, Fetah Rudi, ka folur për gjendjen shëndetësore pas infektimit me koronavirus. Rudi për Klan Kosovën ka thënë se gjendja e tij shëndetësore aktualisht është pa ndonjë shqetësim, ndonëse është duke u trajtuar me terapinë e përcaktuar.

“Pasi përfundova analizat në Malishevë, më rekomanduan të drejtohem në Prishtinë. Aty shkova në Infektivë, më vendosën në Pulmologji – atje ma bën një tretman të mirë doktorët të cilët i falënderoj shumë, sikurse dhe në Infektivë.

Më rekomanduan ta bëj testin për koronavirus në spital”, ka treguar Rudi.

Ai, po ashtu, bëri të ditur se, përveç tij, askush nga rrethi i tij familjar nuk janë të infektuar me koronavirus. Megjithatë, pavarësisht kujdesit, deputeti i LDK-së ende nuk e di se kush ka qenë kontakti nga e ka marrë infeksionin. “Nuk e di, kam pasur shumë kontakte. Por, unë mirë jam, besoj se do t’ia dal dhe do ta kaloj këtë sfidë”.