Gjykata Kushtetuese ka konfirmuar pranimin e kërkesës së Partisë Demokratike të Kosovës (PDK) lidhur me procesin e konstituimit të Kuvendit.

“Konfirmojmë dorëzimin e kërkesës nga Partia Demokratike e Kosovës (PDK) përkitazi me konstituimin e Kuvendit”, është thënë në përgjigjen e Gjykatës  Kushtetuese për “RTV21”.

Shefi i Grupit Parlamentar të PDK-së, Arian Tahiri, ka thënë sot se presin që Gjykata Kushtetuese të vendosë masë të përkohshme për të parandaluar pasoja të mëtejshme juridike dhe institucionale.

Kërkesa e PDK-së vjen një ditë pasi Kuvendi i Kosovës votoi qeverinë Kurti 4, në një seancë të jashtëzakonshme.

Qeveria është votuar me 62 vota për, ndërsa tetë vota kundër kanë ardhur nga deputetët e Listës Serbe. Deputetët e PDK-së, LDK-së dhe Aleancës nuk kanë marrë pjesë në seancë.

Votimit të Qeverisë i ka paraprirë vazhdimi i seancës konstituive të Kuvendit, të mbajtur në orët e paradites.

Kryetarja e Kuvendit, Albulena Haxhiu, e ka shpallur të konstituuar Legjislaturën e 11-të, ndonëse nuk ishte zgjedhur nënkryetari nga radhët e PDK-së.

PDK-ja e ka bojkotuar vazhdimin e seancës, duke pretenduar se në këtë proces janë shkelur Kushtetuta dhe ligjet.