Këshilltari amerikan për siguri kombëtare, John Bolton, ka bërë thirrje që Kosova dhe Serbia t’i zgjidhin mosmarrëveshjet.

Tensionet në mes të dy vendeve janë rritur në javën e kaluar, kur qeveria kosovare mori vendim për taksë 100 për qind ndaj produkteve serbe.

Boltoni ka postuar një shkrim në llogarinë e vet në “Twitter”, ku shkruan: “Tash është koha që Kosova dhe Serbia ta arrijnë marrëveshjen. ShBA-ja është e gatshme që t’ju ndihmojë të dyja palëve për ta arritur këtë qëllim historik”.

Këto fjalë i ka publikuar pas takimit me presidentin e Kosovës, Hashim Thaçi.

Në anën tjetër, presidenti Thaçi, ka thënë se marrëveshja me Serbinë do t’i ndihmonte përpjekjet e Kosovës për t’u anëtarësuar në NATO, BE dhe Kombet e Bashkuara.

“Ekziston një mundësi historike në dialog, e cila nuk duhet të humbet nga asnjëra palë”, ka shkuar Thaçi në llogarinë e vet në “Twitter”.

Vendimi i qeverisë kosovare për taksë 100 për qind për produketet serbe solli dorëheqjen e kryetarëve të komunave të veriut dhe mbajtjen e disa protestave nga serbët. Takimi i Thaçit me Boltonin ka ndodhur vetëm një ditë pasi ai është takuar edhe me sekretarin amerikan të Shtetit, Mike Pompeo, shkruan “Radio Evropa e Lirë”